Timmii Duuɓi 87 hikka ko Madiina Gunaas siňcaa, ma won biiɗo mbaar en njuumaani de, jeyata sabaabu oo noon, ina woodi nanoowo Madiina mbo meeɗa yaade toon sikkata ko madiina siňcaa e jooni wonii duuɓi 200, walla oon jiiɗo ngo e ngol mawnugol, sikka ko ngo heewngo duuɓi sabu njaajeendi maggo, Madiina ko wuro Diine ngo Jiyaaɗo Allah biyeteeɗo Ceerno Alh Muhammadu Saydu Bah Siňci(sosi) ngam Dewal Allah e Sunna Nelaaɗo Allah e Allah (SAW) e Laawol Seekanaa Ahmadu Tijjani Rta.
Ceerno Alh Muhammadu Saydu Bah noon ko jiyaaɗo Allah moƳƳo, guurɗo hakkinde 1900 e 1980, o gollanii Lislaam kaaddi nguurndam makko, ɗeen golle ina njokki haa hannde, o Ƴellitii sunna Annabi oo SAW, o laynii laawol Tijjaaniya no feewi…
Madiina Gunaas noon ko wooto e gure makko ɗew siňci ngam gollanaade Allah e Nelaaɗo mum, ɗum wonnoo ko ňande 27 colte 1936 ina hawri e 04 taaske 1354, ɗum waɗi ko caggal duttagol e joomum Ceeno Makko Alhajji Aali Caam e 1935, ko balɗe o waɗi ɗoon caggal duttagol oon, tawi feeňaniimo o waawata heddaade ɗoon e ngoon wuro ngoo ferannoo e hedde 1931 hono Madiina Alhajji, ko ndeen o immii omo yiiloyo ɗo Allah hoɗnimo fof, o rewii nokkuuji keewɗi tee jarabuyeeji keewiino heen hono no kala Jiyaaɗo Allah jogorɗo waɗde huunde nii, koy nguun njiilaw Addimo haa ɗo wuro wiyeteengo Teemantu, Tawi Ardinoo oon diiwaan ko biyeteeɗo Yero Jeynaba Almuudu C Alhajji Aali Caam, oon jaɓɓiimo no feewi hollitimo Bismilla makko e nokku hee yo o hoɗ kala ɗoo yiɗi hoɗde heen fof, ko oon waddimo e gannduɗo ladde nde e ina wiyee Sammba Bah, hoɓe njiilo haa ɓe ngari ɗo Madiina woni hannde ɗoo, ɓe tawi ɗoon Gurel ina wiyee Gunasel, ɓe njippini ɗoon bagaas maɓɓe, ko caggal mum ɓe njiiti nokku oo ɗum woni ɗoo Lelii hannde ɗoo e nder Jumaa mawka kaa, caggal mum ɓe paati to Ceekeewi too(ɗuum tawetee hannde koy leegal Ɗaybatu), ňande heen Ceerno ina wondu noo e yimɓe njeeɗiɗo, ɓe ngadii juulde ɗoon ko tiisubaar. Caggal mum o nelani ɓeen heddinooɓe Madiina Alhajji ɓe, ko ndeen o inni wuro ngoo o wi’i ngo Madiinatul Munawwara kono ngo lolliri tan ko Madiina Gunaas, ko ndeen o lelni sarɗiyeeji pawiiɗi e Deftere Allah teddunde ndee, ko nootiimo koo fof koy ɗuum nootiimo. O ɗowii Wuro ngo fotde duuɓi 44 haa o ruttii ňande 26/06/1980, caggal mum lomtiimo ko ɓiyiiko tedduɗo, oon woni Ceerno Alh Aamadu T Bah e miňiraaɓe mum, e ɓesnguuji seeremɓe makko, ko ɓeen njokki ɗum haa yettii ɗo yettii ɗoo.
Madiina Gunaas noon ko wuro mawngo hannde e nder leydi senegaal, mahiingo e sunna nelaaɗo Allah SAW, ngo tawetee koy diiwaan koldaa, falnde welingaraa, tunndu boŋkonto, kongo komin hongo huufi 33 wuro, ɗeen gure keewɗe heen ko kanko siňci ɗumen, ina fina e wuro ngoo hannde ko ina wona teemedere ujunere neɗɗo(100 000). Tuggude e 15 ndu lewru colte 2022 ko Alh Baro woni Meer wuro ngo o lomtii ko Alh Saydu Bah, caggal nde oon timmini mannda mum, ngaal lomtungal waɗi ko e yamiroore Ceerno, Madiina Gunaas ina soomi kaawisaaji limti-limtinɗi, ina e majji no wuro ngoo heddorii eko jiyaaɗo Allah oo yiɗnoo ko, haa e mawnugol makko tawi koy duuɓi seeɗa tan, laabi mawɗi portiiɗi galleeji jaajɗi sunniyaŋkooji. galle fof mbo nji’ɗa ina waɗi lekɗe njaamateeɗe, belɗe ɗeen ngoni lekɗe maŋngooje, leeɗe mawɗe inniraaɗe inɗe malu, Ɗeen ngoni ɗee:👇
Maadiina hakkunde.
Sifaawu.
Nasurullaahi,
Amaanatullaahi.
Rahmatullaahi.
Karaamatu.
Muusdalifa.
Daaru.
Ukkaas.
Aafiya.
Musfala.
Salaa.
Falaa.
Misira.
Ɗaybatu.
Ruumde.
Neere.
Saraap.
Ina heen leeɗe ko mawɗo no feewi, ɗeen ngoni Sifaaw e Nasurullaahi ekn, hoɗe mbaɗi 1 e 2 haa 3. Leegal fof na waɗi jamaa, kadi na waɗi duɗe AL QURAANA keewɗe, haani e duɗe pulaar. E kala hitaande wuro ngoo na jaɓɓoo keeweendi teskinndi, tawi ko Arooɓe tawtoreede ndeen lulnde Alliyaŋkoore hono Daakaa mbo Madiina Gunaas, mbo jiyaaɗo Allah oo darni e hitaande 1942, tawi ko ngam dewal Allah tan, Koolol hikka ngol jogori jooɗaade ko ñande Aset paaɗo ina hawra e 05 Mbooy.
To baŋnge kumpital wuro ngoo fof e e joňaade Aduna, gila e nguurndam jiyaaɗo Allah o, o soodiino maňoto o wiyi wondiiɓe makko ɓe ayso o ɗojju yo naŋngu, ko o paamnooɗo maa karalle kese hannde ɗe ngar. Ko Adii fof gila 2016 wuro ngoo na jogii Saaktirde(Rajo), Wiyeteengo Daakaafm 94.9 ardiingo ko Alh Abuu Njaay Funeere Kumpital, ina heen Daakaa tv, to bannge Karalle kese ɗee Ina Woddi Lowre wiyeteende Daakagounass e Batuuji Sunna… Senngo binndol Jaaynde Caafal; Beetawe… E weeyo he ko wayino Blog Jaalo Maabo, Kuɗol Tenngaade, kaňji fof hoɗi ndarii laŋ ngam yo winndere ndee humpito geɗe Dental ngal. Pelle tiiɗɗe dariiɗe laŋ ina tawee e maggo yeru Kawtal Golle, CEOD EKn.
Ko en jubbuɓe e kala heen huunde, Alaa heen fof ɗo njaajni ɗen, ko yiɗde siftinde tan, ina heen kadi ŋakkeende men to baŋnge humpito. Ko wiide tan Yoo Allah yoɓ C Alh MS BAH moƳƳere, o reeno ngoo wuro fergo, o juutna nguurndam Ceerno e waldiiɓe mum, rokka en heddaade e jamirooje maɓɓe.
Kuɗol Ɗaahaa Muusaa Bah.
daahaabah@gmail.com
