DAAKAA : HOLI NDEE LULNDE.
Daakaa Madiina Gunaas sosaa ko hitaande 1942, sosimo ko jiyaaɗo Allah moƳƳo, oon woni Ceerno Alh Muhammadu Saydu Bah ko ndeen hitaande nii o artunoo hajju laawol makko gadanol.Kadi ko ndeen jumaa ngadana kaa mahaa kaan ko huɗo e ɓakkere wonnoo, ko fodde lewru ka gasi.Daakaa 1942 waɗi ko to Ayunimaadi funnage wuro ngoo, Daakaa ɗimmo oo ko 1943 to jiiwleen, oon Daakaa jooɗiima fodde lewru, hitaande 1944 daakaa waɗaani ko gammbinaaɓe ngarannoomo ngam o wallaɓe e diine hee, Caggal ceerno makko Alhajji Aali Caam, ko ngaal woni ɗanngal makko gadanal e diine Lislaam tawde kayi wonaa hajju oo.1948 Daakaa waɗiin o jooɗiima fodde lewru. Heddii ko kala hitaande nde ceerno ɗanni Daakaa waɗataa so tawii Embo ɗoo Daakaa na waɗa haa 1960 ko ndeen fuɗɗi reggondirde, oon Daakaa ko Faas Subalɓe jooɗino. Daakaa 1961 waɗi ko Bustaan,ko ndeen Taanum Seek Tijjaani fuɗɗi taweede Daakaa oon ana wiyee Sarif Bun Saalim(RTA).
Tuggude e 1960 haa jooni Daakaa meeɗa furgude,kono pellital yoo waɗtu reggondirde ɓamaa ko Daakaa 1963 oon Daakaa fotde mawɓe tawanooɓe ɓee, ɓe kaaldi haaɓe kawri, yoɓe ňaago Ceerno yoo Ƴettanɓe pellital e anniya to Allah, Daakaa waɗta waɗde e kala hitaande sabu yiideɓe ko ɗum ɓeydataɓe e diine hee, e nehdi e tijjaaniya he, tawi ňande heen janngo e mum Daakaa oo ina duwee,ɓe ndesndi konngol ngol, Ceerno Aliw Saaliif to Ɓokki Jawe, oon yettini ɗum Ceerno ko ɓaawo ɗum Ceerno « wi’i o jaɓii tee o jaɓi ɗum koto Allah e Nelaaɗo mum Alaa haaju baawɗo haɗde ɗum waɗde hankadi ».ɗuum ko Unifani wonnoo, gila ndeen Daakaa taƳondiraani.Daakaa oo Arti ɗo o woni jooniɗo ko hitaande 1973, ɗuum ko funnaange wuro ngoo fodde kilooji 10. Ceerno Alh Muhammadu saydu bah(RTA) ardiima Daakaa gila 1942 nde o sosi ɗum ndee haa nde o ruttii e Joomiiko ňande 26/06/1980. Gila ndeen jokki golleɗee ko khaliifa makko oo hono Ceerno men Alh Aamadu Tijjaani Bah, e ɓesnguuji Seeremɓe Ceerno kam e Miňiiraaɓe khaliifa oo ko wayino Ceerno Abdul Asiis Bah baɗɗo heen golle mawɗe, haa fooftoyii ňande 19 juko 2019, e Ceerno Ibun Umara Ceerno, yoo Allah juutnu nguurndam makko, ko ɓee e wallidiiɓe mum en, ɗowi geɗe ɗee haa njetii ɗo njettii ɗoo hannde.
Holi ko golletee e Daakaa ?
Daakaa alaa ko waɗiraa so wonaa rewde Allah, kam e jokkere enɗam, haanii e ňobbude pittaali ɗii e geɗe Aduna. Ko ɗum golletee e Daakaa :01 Waktuuji joyi njuulu ɗii to dental.
02 Wasifaaji(Wajifaaji) ɗii subaka e kikiiɗa.
03 Ňalawma fof 12000 Salaatul faatiha, walla kam 6000 haa 1000 no ɗemɗe mbaadi.
04 Silkeeji Alɓuuraana.
05 janngude sayfiyaaji.
06 Juurondirde e musiɗɓe juulɓe ɓe kawru ɗaa e lulnde hee ɓee.
07 barkinoraade e ngesa Ceeeno hee ngam baraaji.Ɗum ina jeyaa e geɗe maantiniiɗe golleteeɗe e Daakaa hee, Fof so renndii duwee ňande caakol nde duwone juulɓe fof to ngoni e aduna oo. Yoo Allah yeɗ en ɓural ngal.
Kuɗol: ✍️ Ɗaahaa Muusaa Bah.
